Бишкектеги №57 мектеп жаңы окуу жылына чейин толук оңдолот
Бишкек шаарынын мэриясынын Капиталдык курулуш башкармалыгы тарабынан Ленин районунда жайгашкан №57 муниципалдык орто жалпы билим берүү мектебинин имаратында капиталдык оңдоо иштери уланууда.
Муниципалитеттин маалыматына ылайык, мектептин имараты 1962-жылы курулуп, 920 окуучуга ылайыкталган. Пайдаланууга берилгенден бери имаратта биринчи жолу капиталдык оңдоо жүргүзүлүүдө. 2025-2026-окуу жылында мектепте 1682 окуучу билим алган.
Учурда объекттеги демонтаждоо иштери толугу менен аяктады. Бүгүнкү күндө чатырды жабуу, дубалдарды шыбоо, имараттын фасадынын темир каркасын орнотуу жана башка курулуш-монтаждоо иштери жүрүп жатат.
Долбоордун алкагында инженердик тармактарды жаңылоо, имараттын ички жана сырткы жасалгалоо иштерин жүргүзүү, фасадын жана чатырын капиталдык оңдоо каралган. Курулуш иштерин "Рим и Ко" ЖЧКсы жүргүзүүдө.
Капиталдык оңдоо иштерин 2026-2027-окуу жылынын башталышына чейин толук аяктоо пландалууда. Оңдоо иштери бүткөндөн кийин окуучулар жана мугалимдер үчүн заманбап, коопсуз жана ыңгайлуу билим берүү шарттары түзүлөт.
