Нурдан Орунтаев Караколдогу тарыхый музейдин оңдоп-түзөө иштерин текшерди
Курулуш, архитектура жана турак жай-коммуналдык чарба министри Нурдан Орунтаев Каракол шаарына болгон иш сапарынын алкагында тарыхый музейде жүргүзүлүп жаткан реконструкция иштеринин жүрүшү менен таанышты.
Министрликтин маалыматына ылайык, долбоор жергиликтүү бюджеттин эсебинен каржыланып, анын жалпы наркы 159 миллион сомду түзөт. Реконструкция иштерин Курулуш министрлигине караштуу "Кыргызкурулуш" мамлекеттик ишканасы аткарууда.
Нурдан Орунтаев тарыхый-архитектуралык мурастын сакталышын камсыз кылуу, реставрация иштерин талапка ылайык жогорку деңгээлде жүргүзүү жана белгиленген графиктен кечиктирбестен бүткөрүү боюнча тиешелүү тапшырмаларды берди.
Учурда музейде ички жана сырткы жасалгалоо, ошондой эле инженердик тармактарды жаңылоо иштери уланууда. Бүгүнкү күнгө карата демонтаж иштери, чатырды оңдоо, терезелерди орнотуу, пол конструкцияларын бекемдөө жана сырткы көрктөндүрүү иштеринин негизги этаптары аяктады.
Мындан тышкары, объектте электр монтаждоо, ички жасалгалоо жана инженердик системаларды орнотуу иштери жүргүзүлүүдө.
Башкы планга ылайык, музей комплекси үч корпустан турат. Имараттардын жалпы аянты 1316 чарчы метрди түзөт.
Реконструкциянын негизги максаты — тарыхый музейдин архитектуралык өзгөчөлүктөрүн жана тарыхый баалуулугун сактоо менен бирге, имаратты заманбап талаптарга ылайык жаңылоо жана музейге келген жарандар үчүн ыңгайлуу шарттарды түзүү.
