Жаратылыш паркында мыйзамсыз мототранспорт айдаган жаранга чара көрүлдү
Жаратылыш ресурстары, экология жана техникалык көзөмөл министрлигине караштуу "Чоң-Кемин" мамлекеттик жаратылыш паркынын кызматкерлери тарабынан жаратылышты коргоо мыйзамдарынын талаптарынын сакталышын камсыз кылуу максатында кезектеги рейддик иш-чара өткөрүлдү.
Ведомствонун маалыматына ылайык, рейддин жүрүшүндө парктын аймагында мототранспорт каражаты менен мыйзамсыз жүрүп, жайыт жерлерине зыян келтирген жаран аныкталды.
Аталган факты боюнча мыйзам бузган жаранга Кыргыз Республикасынын мыйзамдарына ылайык тиешелүү протокол түзүлүп, 10 миң сом өлчөмүндө айып пул салынды. Ошондой эле ага жаратылышты коргоо мыйзамдарынын талаптарын сактоо боюнча түшүндүрүү иштери жүргүзүлдү.
Жаратылыш ресурстары, экология жана техникалык көзөмөл министрлиги жарандарды айлана-чөйрөгө аяр мамиле кылууга жана жаратылышты коргоо мыйзамдарынын талаптарын так сактоого чакырат.
Өзгөчө корголуучу жаратылыш аймактарында мыйзам бузуулардын алдын алуу жана аныктоо боюнча рейддик иш-чаралар туруктуу негизде улантылат.
