Бишкекте тротуарды бузган курулуш компаниясы кара тизмеге киргизилди
Бишкек шаарынын Көк-Жар кичи районундагы 7-Апрель көчөсүндө жайгашкан курулуш объектисинде жөө адамдар өтүүчү тротуардын бузулушу боюнча текшерүү жүргүзүлдү. Бул тууралуу Курулуш министрлигинен билдиришти.
Маалыматка ылайык, текшерүүдө жер казуу иштеринен улам тротуар бузулуп, айрым жерлеринде жаракалар пайда болгону аныкталды. Ошондой эле көрктөндүрүү, коопсуздук жана курулуш талаптары сакталган эмес. Мындан тышкары, объект Мамлекеттик бирдиктүү курулуш реестрине катталбастан курулуш-монтаждоо иштери жүргүзүлгөн.
Натыйжада "Улан Строй Компани" ЖЧКсына 200 миң сом айып салынып, лицензиясы 90 күнгө токтотулду жана компания кара тизмеге киргизилди.
Прораб жана инженердик-техникалык кызматкерлер квалификациялык сертификаттарынан ажыратылды. Департаменттин тиешелүү инспектору кызматынан бошотулуп, объектинин жумушчу долбоору жана шаар куруу корутундусу жокко чыгарылды.
Компанияга бузулган тротуарды толук калыбына келтирүү талабы коюлду. Ошондой эле объекттеги оор жүк ташуучу атайын техникаларды пайдаланууга тыюу салынып, аларга мөөр басылды.
Учурда жөө жүргүнчүлөрдүн коопсуздугу үчүн бузулган тилке тосулуп, кошумча жарыктандыруу орнотулду.
