Чаткалда алтын казган ишкерлерге мониторинг жүргүзүлдү
Жерди жана сууну көзөмөлдөө боюнча кызматтын Жалал-Абад облусундагы аймактык башкармалыгы Чаткал районунун Каныш-Кыя айыл аймагында алтын өндүрүү менен алектенген ишкерлерге мониторинг жүргүздү. Бул тууралуу Айыл чарба министрлигинин басма сөз кызматынан билдиришти.
Маалыматка ылайык, мониторингдин негизги максаты — алтын өндүрүүдө жер жана суу ресурстарын пайдалануу боюнча мыйзам талаптарынын сакталышын, ошондой эле Министрлер Кабинетинин 2021-жылдын 18-октябрындагы №222 токтомунда белгиленген талаптардын аткарылышын көзөмөлдөө.
Мониторинг учурунда жер тилкелерин пайдалануунун белгиленген тартибине, суу ресурстарын туура пайдаланууга жана өндүрүш иштеринин айлана-чөйрөгө тийгизген терс таасирин алдын алуу боюнча талаптардын аткарылышына өзгөчө көңүл бурулду.
Мындан тышкары, ишкерлерге жер жана суу мыйзамдарынын талаптарын так сактоо, өндүрүш иштерин тиешелүү уруксат берүүчү документтердин негизинде жүргүзүү жана жаратылыш ресурстарына аяр мамиле кылуу боюнча түшүндүрүү иштери жүргүзүлдү.
