Фитосанитардык көзөмөлдөгү кемчиликтерди жоюу боюнча тапшырмалар берилди
Суу ресурстары, айыл чарба жана кайра иштетүү өнөр жайы министрлигине караштуу Өсүмдүктөрдү химиялаштыруу, коргоо жана карантин департаментинин коллегиялык жыйыны өттү.
Ведомствонун маалыматына ылайык, жыйынга министрликтин Өсүмдүк өстүрүү жана багбанчылык башкармалыгынын башчысы Туратбек Идрисов, департаменттин жетекчилиги, борбордук аппараттын кызматкерлери, аймактык башкармалыктардын жетекчилери жана адистер катышты.
Коллегияда департаменттин 2026-жылдын биринчи жарым жылдыгындагы ишинин жыйынтыгы чыгарылып, аткарылган иштер жана алдыдагы милдеттер талкууланды.
Департаменттин жана аймактык башкармалыктардын отчеттору угулуп, жетишкендиктер, көйгөйлөр жана иштеги кемчиликтер каралды.
Жыйында мамлекеттик фитосанитардык көзөмөлдүн сапатын жогорулатуу, өсүмдүктөрдүн карантини жана коргоосу, пестициддер менен жер семирткичтердин жүгүртүлүшүн көзөмөлдөө маселелерине өзгөчө көңүл бурулду. Ошондой эле импорттук жана экспорттук продукциялардын фитосанитардык талаптарга шайкештигин камсыз кылуу талкууланды.
Туратбек Идрисов жетекчиликтин тапшырмаларын жеткирип, департаменттин алдыдагы ишинин негизги багыттарын белгиледи.
Жыйынтыгында аныкталган кемчиликтерди жоюу, иштин натыйжалуулугун жогорулатуу жана тапшырмаларды өз мөөнөтүндө аткаруу боюнча тиешелүү жетекчилерге тапшырмалар берилди.
