Караколдогу ири спорт шаарчасынын курулушу кайсы этапта?
Курулуш, архитектура жана турак жай-коммуналдык чарба министри Нурдан Орунтаев Ысык-Көл облусуна болгон иш сапарынын алкагында Каракол шаарынын Кашка-Суу кичи районунда курулуп жаткан заманбап спорт шаарчасынын курулуш иштеринин жүрүшү менен таанышты.
Ведомствонун маалыматына ылайык, Курулуш министрлиги тарабынан ишке ашырылып жаткан долбоор 12 гектар аянтты ээлейт. Анын алкагында 275 орундуу спорт интернатын, эл аралык стандарттарга жооп берген 5 миң орундуу көп функционалдуу спорт комплексин, олимпиадалык стандарттагы бассейнди жана 200 орундуу мейманкананы куруу каралган.
Объектти көрүп чыгуу учурунда Нурдан Орунтаев курулуш иштеринин сапатына өзгөчө көңүл буруп, жумуштарды белгиленген мөөнөттө аяктоо, курулуш ченемдерин жана техникалык талаптарды так сактоо боюнча тиешелүү тапшырмаларды берди.
Учурда спорт шаарчасынын аймагында пайдубалдарды куруу жана темир-бетон конструкцияларын даярдоо иштери жүрүп жатат. Мейманкананын пайдубал балкаларын жана ресторандын мамыларын арматуралоо улантылууда. Ошондой эле бассейн курула турган жерде жер казуу иштери башталды.
Спорт шаарчасы пайдаланууга берилгенден кийин спортчуларды даярдоого, окуу-машыгуу жыйындарын өткөрүүгө жана эл аралык деңгээлдеги мелдештерди уюштурууга заманбап шарттар түзүлөт.
Курулуш иштери "Кыргызкурулуш" мамлекеттик ишканасынын көзөмөлүндө жүргүзүлүүдө.
