Кыргызстанда дан эгиндерин оруп-жыюуга 1459 комбайн тартылды
Кыргызстанда дан эгиндерин оруп-жыюу өнөктүгүнө жалпы 1459 комбайн тартылды. Техникалар түшүмдүн бышып жетилүү мөөнөтүнө жараша аймактарга бөлүштүрүлдү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Чүй облусундагы оруп-жыюу иштерине Ысык-Көл жана Нарын облустарынан 100дөн ашык дан комбайны тартылган. Учурда облуста оруп-жыюу өнөктүгү жыйынтыкталуу алдында турат.
Ал эми өлкөнүн түштүк аймактарында түшүм жыйноого 450гө жакын дан комбайны катышууда. Анын ичинен 100гө жакын техника тоо этегиндеги дыйканчылык зоналарына багытталган.
Маалыматка ылайык, 2026-жылы бир комбайнга туура келген оруп-жыюу аянты орточо 259 гектарды түздү.
Учурда дан эгиндерин оруп-жыюу өнөктүгү Ысык-Көл жана Нарын облустарында да башталды. Техникалардын аймактарга өз убагында бөлүштүрүлүшү түшүмдү белгиленген мөөнөттө жана коромжусуз жыйнап алууга багытталган.
