Жети айда 387 этникалык кыргыз кайрылман статусун алды
Кыргызстанда 2026-жылдын жети айында 387 этникалык кыргызга кайрылман статусу берилди. Бул тууралуу Эмгек, социалдык камсыздоо жана миграция министрлиги маалымдады.
Министрликтин маалыматына ылайык, кайрылман статусун алгандардын басымдуу бөлүгү Тажикстандан келген этникалык кыргыздар. Тактап айтканда, Тажикстандан келген 351, Өзбекстандан 16, Кытайдан 10, Россиядан 5, Ооганстандан 1 жана башка өлкөлөрдөн келген 4 адам кайрылман статусуна ээ болгон.
Кыргызстан эгемендүүлүккө ээ болгондон бери өлкөгө 90 миңден ашуун этникалык кыргыз көчүп келген. Алардын 70 миңге жакыны Кыргыз Республикасынын жарандыгын алган.
Кайрылман статусун берүү боюнча арыздар атайын ведомстволор аралык комиссия тарабынан каралат. Анын курамына Улуттук коопсуздук мамлекеттик комитетинин, Ички иштер министрлигинин, Эмгек, социалдык камсыздоо жана миграция министрлигинин, ошондой эле Президенттин Иш башкармалыгына караштуу "Кызмат" мамлекеттик мекемесинин өкүлдөрү кирет. Арыздарды кароо мөөнөтү үч айды түзөт.
Мыйзамга ылайык, кайрылман статусуна ээ болгон адамдар социалдык жөлөкпул жана пенсия алууга, медициналык-санитардык жардамдан пайдаланууга, билим алууга жана Кыргызстандын аймагында эмгектенүүгө укуктуу. Алар үчүн өлкө жарандарына каралган социалдык кепилдиктерге жана жеңилдиктерге дээрлик тең укуктар каралган.
Кайрылмандын күбөлүгү үч жылдык мөөнөткө берилет. Бул убакыт аралыгында статус ээлери Кыргыз Республикасынын жарандыгына кабыл алуу жөнүндө арыз менен кайрылууга тийиш.
