"Айып пулуңуз бар": Кыргызстанда жаңы алдамчылык схема жайылууда
Башкы прокуратура Tolom.kg расмий сервисин туураган фишингдик сайттар аркылуу жасалган алдамчылык учурлары көбөйүп жатканын эскертти.
Маалыматка ылайык, алдамчылар жарандарга жол кыймылынын эрежелерин бузгандыгы үчүн төлөнбөгөн айып пулу бар экени тууралуу жалган SMS-билдирүүлөрдү жөнөтүп, жасалма сайттарга өтүүнү сунуштап жатышат.
Алардын арасында tolom.p4zr.top, tolom.a7km.top жана tolom.pw сыяктуу даректер бар.
Жасалма сайттарда колдонуучулардан банк картасынын номерин, CVC/CVV-кодун жана SMS аркылуу келген ырастоо кодун киргизүү талап кылынат. Мындай маалыматтарды берүү банк эсебиндеги акчанын уурдалышына алып келиши мүмкүн.
Башкы прокуратура Tolom.kg кызматы айып пулдардын бар-жогун текшерүү үчүн гана арналганын белгилейт. Расмий сервис төлөмдөрдү кабыл албайт жана банк картасынын реквизиттерин сурабайт.
Жарандарга шектүү шилтемелерге өтпөө жана белгисиз интернет-ресурстарга банк картасынын маалыматтарын киргизбөө сунушталат.
Айып пулдардын бар-жогун Tolom.kg расмий сайтынан, мамлекеттик порталдардан же банктардын расмий мобилдик тиркемелеринен гана текшерүү зарыл.
Алдамчылык фактысына туш болгон жарандар укук коргоо органдарына токтоосуз кайрылышы керек.
