Нурдан Орунтаев "Ала-Тоо Резорттогу" курулуштун сапатын текшерди
Курулуш, архитектура жана турак жай-коммуналдык чарба министри Нурдан Орунтаев Ысык-Көл облусуна болгон иш сапарында Ак-Суу районундагы "Ала-Тоо Резорт" тоо-лыжа курортунда курулуп жаткан ири инфраструктуралык объектилердин абалы менен таанышты.
Министрликтин маалыматына ылайык, курорттогу медициналык пункттун, лыжа жабдууларын ижарага берүү жана оңдоо имараттарынын, атайын техника үчүн гараждын, тейлөөчү кызматкерлер жана администрация үчүн каралган имараттардын курулушу текшерилди.
Ошондой эле суу менен камсыздоо жана башка инженердик инфраструктура объектилериндеги иштердин жүрүшү менен таанышты.
Учурда объектилерде жер казуу, пайдубал куруу, арматура орнотуу жана бетон куюу иштери жүргүзүлүүдө. Мындан тышкары, суу алуучу аянтча курулуп, ички суу түтүк тармактары тартылууда. Ар бири 1000 куб метр суу батыра турган төрт резервуар жана канализациялык-тазалоочу курулмалар да курулууда.
Бүгүнкү күндө суу алуучу аянтчанын курулушу 95%га, ички суу түтүк тармактарын тартуу 50%га, ал эми төрт ичүүчү суу резервуарынын курулушу 60%га аткарылган.
Текшерүүнүн жүрүшүндө Нурдан Орунтаев курулуш иштеринин сапатына өзгөчө көңүл буруп, бардык иштерди бекитилген талаптарга ылайык жүргүзүүнү тапшырды.
