Суткасына 800 тонна таштанды иштетет: Оштогу заводдун курулушу кайсы этапта?
Ош шаарында таштандыны кайра иштетип, андан электр энергиясын өндүрө турган ири заводдун курулушу уланууда. Учурда имараттын биринчи кабаты толугу менен көтөрүлүп, экинчи кабатын куруу иштери жүрүп жатат. Бул тууралуу калаа мэриясынан билдиришти.
Маалыматка ылайык, заводду кытайлык "Цзюньсинь Хуаньбао Кей Джи Инвест" компаниясы куруп жатат. Учурда объектинин бардык блокторунда курулуш иштери жүрүп, жеринде 200гө жакын жумушчу эмгектенүүдө.
Завод толук ишке киргенден кийин суткасына 800 тоннадан ашык, ал эми жылына 310 миң тоннага чейин таштандыны кайра иштетүү пландалууда. Кайра иштетүүнүн натыйжасында электр энергиясы өндүрүлөт.
Ири заводдун курулушун 2027-жылдын аягында толугу менен бүткөрүп, пайдаланууга берүү пландалууда.
Ош шаарынын мэри Жанарбек Акаев буга чейин курулуш аянтына бир нече жолу барып, аткарылып жаткан иштердин жүрүшү менен таанышкан.
Мэриядан белгилешкендей, долбоордун ишке ашырылышы шаардагы таштанды маселесин чечүүгө жана айлана-чөйрөгө тийгизген терс таасирди азайтууга багытталган.
Бул Кыргызстанда таштандыны кайра иштетип, электр жарыгын өндүрүүгө багытталган экинчи ири завод болот.
