Бишкек мэри социалдык объектилердин курулушун текшерди
Кечээ Бишкек шаарынын мэри Айбек Джунушалиев борбор калаада курулуп жана оңдолуп жаткан социалдык объектилердин абалы менен таанышты.
Муниципалитеттин маалыматына ылайык, "Ак-Тилек" конушунда мэр Ак-Шоокум көчөсүндө салынып жаткан бала бакчанын курулушун текшерди. Учурда объектте от казанын куруу, имараттын ички жана сырткы жасалгалоо иштери жүрүүдө.
Ошондой эле шаар башчысы заманбап маданий борбордун курулушу менен таанышты. Үч кабаттуу борбордо музыкалык жана театралдык класстар, көргөзмө залы, фуд-корт, маданий жана коомдук иш-чараларга арналган көп функционалдуу жайлар каралган. Мындан тышкары, унаа токтотуучу жайлар болот.
Мэр №69 орто мектепте жүргүзүлүп жаткан капиталдык оңдоо иштерин да текшерди. Учурда демонтаж иштери аяктап, ички дубалдар шыбалууда. Имараттын фасадын жылуулоо жана жасалгалоо иштери да жүрүп жатат.
Текшерүүнүн жыйынтыгында Айбек Джунушалиев жооптуу кызматтарга курулуш иштеринин сапатына жана темпине көзөмөлдү күчөтүүнү тапшырды.
