Бишкекте бир жер тилкеси беш жолу сатылып, талаш сотко жетти
Бишкектин "Рухий-Мурас" конушунда бир жер тилкеси үчүнчү жактар тарабынан беш жолу кайра сатылып, анын айланасында талаш жаралган. Учурда бул боюнча соттук териштирүүлөр жүрүп жатат. Бул тууралуу мэриядан билдиришти.
Маалыматка ылайык, кечээ Бишкек шаарынын мэри Айбек Джунушалиев аталган конуштун тургуну менен жолугуп, жер тилкесине байланыштуу маселесин карады.
2006-жылы жаранга жер тилкесин берүү тууралуу токтом кабыл алынган. Бирок ал ушул күнгө чейин документтин негизинде жерге болгон укугун мыйзамда белгиленген тартипте жол-жоболоштуруп, каттоодон өткөрө алган эмес.
Кийинчерээк аталган жер тилкеси үчүнчү жактар тарабынан беш жолу кайра сатылган. Натыйжада жерге болгон укук боюнча талаш жаралып, маселе сотко жеткен. Мэриянын маалыматына караганда, кырдаалдын жагдайларын коңшу үйлөрдүн жашоочулары да ырасташкан.
Мэр менен болгон жолугушууда тургун сунуштаган документтер жана талаштын жагдайлары каралды. Талкууга укук коргоо органдарынын, шаардык кызматтардын өкүлдөрү жана коңшу үйлөрдүн жашоочулары катышты.
Жыйынтыгында Айбек Джунушалиев тиешелүү кызматтарга документтерди кылдат изилдеп, жер тилкесин мыйзам талаптарына ылайык жол-жоболоштуруу маселесин кароону тапшырды. Укук коргоо органдарына болсо өз компетенциясынын чегинде көмөк көрсөтүү милдети жүктөлдү.
