Бишкекте филармониянын алдындагы "бийлеген" оргума ишке кирди
Бишкекте Токтогул Сатылганов атындагы Кыргыз улуттук филармониясынын алдындагы жаңыланган фонтандын техникалык ачылышы өттү. Бул тууралуу мэриядан билдиришти.
Күн мурун мэр Айбек Жунушалиев Жаштар аллеясында жана филармониянын айланасында жүргүзүлүп жаткан калыбына келтирүү иштеринин жүрүшү менен таанышты.
Жаңыланган оргумага сууну тазалоочу заманбап жабдуулар жана жарык-музыкалык тутум орнотулду. Эми анда музыка жана түрдүү жарыктар менен коштолгон "бийлеген" фонтан эффекттери көрсөтүлөт.
Ошондой эле филармониянын түндүк жана түштүк тарабындагы дагы эки фонтан жаңыланды.
Долбоордун алкагында аймактын жарыктандыруусу жана сугат системасы жаңыланып, видеокамералар орнотулду. Жаңы таман таш төшөлүп, отургучтар жана таштанды челектери алмаштырылды. Мындан тышкары, алты пандус орнотулууда.
Учурда филармониянын фасадын жаңылоо иштери да жүрүп жатат.
Мэр подряддык уюмга техникалык сыноодо аныкталган кемчиликтерди жоюп, калган иштерди толук бүткөрүүнү тапшырды.
