Манаста 500 орундуу мектептин курулушу 60%га аяктады
Манас шаарында Роза Азимова атындагы 500 орундуу жаңы мектептин курулушу жүрүп жатат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Мектеп мамлекеттик бюджеттин эсебинен каржыланып, курулуш иштери 2026-жылдын март айында башталган.
Учурда объекттеги курулуш иштеринин 60%ы аткарылды. Имараттын сыртын жылуулоо иштери башталып, чатырын жабууга даярдыктар көрүлүүдө. Ошондой эле ички жасалгалоо иштери жүргүзүлүп жатат.
Курулушка 100дөн ашык жумушчу тартылган.Долбоор боюнча 500 орундуу мектеп заманбап талаптарга ылайык курулуп, окуучулардын билим алуусу үчүн керектүү шарттар түзүлөт.
Курулуш иштеринин жүрүшү жана сапаты министрликтин тиешелүү департаменттери тарабынан көзөмөлдөнүүдө.
Белгилей кетсек, учурда Курулуш министрлиги тарабынан Манас шаарында жалпы 6 жаңы мектеп курулууда.
