Мэрия: Бишкектеги №151 контурда азырынча турак жай курууга болбойт

Бишкек шаарындагы №151 контурда жайгашкан жер тилкелеринин учурдагы максаттуу багыты турак жай курууга мүмкүнчүлүк бербейт. Бул тууралуу шаар мэри Айбек Жунушалиев аталган аймактагы жер тилкелерине байланыштуу маселелер боюнча жарандар менен жолугушууда билдирди.

Мэриянын маалыматына ылайык, №151 контурдагы жер тилкелери айыл чарба багытындагы жерлерге кирет. Ошондой эле Бишкектин 2050-жылга чейинки Башкы планында бул аймак үчүн функционалдык зоналаштыруу аныкталган эмес.

Жолугушууда жарандар өздөрүнө таандык жер тилкелерине турак жай курууга уруксат берүү маселесин чечүүгө көмөк көрсөтүүнү өтүнүштү.

Айбек Жунушалиев жарандардын жер тилкелерин алып коюу же алардын жерге болгон мамлекеттик актыларын жараксыз деп таануу маселеси каралбай турганын белгиледи.

Ошол эле учурда мэр аталган аймактын функционалдык зоналаштырылышын аныктап, андан кийин жер тилкелерин мыйзам талаптарына ылайык пайдалануу зарылдыгын билдирди. Бул маселени кароодо көп батирлүү турак жайларды куруу мүмкүнчүлүгүн да эске алуу сунушталды.

Жолугушуунун жыйынтыгында Бишкек шаар куруу жана архитектура башкы башкармалыгына №151 контурда функционалдык зоналаштырууну белгилөө боюнча сунуштарды карап чыгуу жана Министрлер Кабинетинин тиешелүү чечиминин долбоору боюнча сунуштарды даярдоо тапшырылды.

Мэр тиешелүү чечим кабыл алынганга чейин аймакта өз алдынча жана уруксатсыз курулуш иштерин жүргүзбөөгө чакырды. Мыйзамсыз курулуштар аныкталса, мыйзам чегинде тиешелүү чаралар көрүлөрү эскертилди.