Москвада миграциялык каттоонун жаңы талабы: "Амина" тиркемеси кимдерге милдеттүү болот?
2026-жылдын 1-сентябрынан тарта Москва шаарында жана Москва облусунда чет өлкөлүк жарандардын айрым категориялары миграциялык каттоодон өтүүдө "Амина" мобилдик тиркемесин милдеттүү түрдө колдонушат. Бул тууралуу Эмгек, социалдык камсыздоо жана миграция министрлиги билдирди.
Жаңы талапка ылайык, 18 жаштан жогорку чет өлкөлүк жарандардын айрым категориялары "Амина" тиркемесин орнотуп, тиешелүү жол-жоболордон өтүүгө тийиш.
Талап төмөнкү жарандарга тиешелүү:
- Москва шаарында жана Москва облусунда билим алып жаткан 18 жаштан жогорку студенттерге;
- аталган аймактарда иштеген чет өлкөлүк жарандардын үй-бүлө мүчөлөрүнө;
- Москвада жана Москва облусунда жеке, конокко, туристтик жана башка максаттарда 90 күндөн ашык жүргөн чет өлкөлүк жарандарга.
18 жашка толо элек жарандарга "Амина" тиркемесин милдеттүү колдонуу талабы жайылтылбайт.
Министрлик бул категорияларга кирген кыргызстандыктарды тиркемени алдын ала орнотуп, миграциялык каттоодон өз убагында өтүүгө чакырат. Өзгөчө студенттерге, эмгек мигранттарынын үй-бүлө мүчөлөрүнө жана Москвада узак мөөнөткө болууну пландаган жарандарга жаңы талаптар менен алдын ала таанышуу сунушталат.
Кошумча маалымат алуу үчүн Кыргызстандын Россиядагы Эмгек министрлигинин өкүлчүлүгүнө кайрылууга болот.
Дареги: Москва шаары, Малая Полянка көчөсү, 7-үй, 5-имарат.
Телефондор: +7 996 968-98-97, +7 925 030-26-27
