Ноокенде таштандыны сайга төккөндөргө 35,5 миң сом айып салынды
Ноокен районунда таштандыларды Алаш сайына таштоо жана тиричилик калдыктарын өрттөө фактылары аныкталып, 35 миң 550 сом айып пул салынды. Бул тууралуу Жаратылыш ресурстары министрлигинен билдиришти.
Маалыматка ылайык, министрликтин Жалал-Абад регионалдык башкармалыгы Ноокен районундагы эс алуу жана тамактануу жайларында экологиялык талаптардын сакталышын текшерүү максатында ыкчам рейд өткөргөн.
Рейд учурунда айрым жайларда таштандыларды Алаш сайына таштоо жана тиричилик калдыктарын өрттөө фактылары аныкталган.
Мыйзам бузуулар боюнча 2 административдик протокол түзүлүп, жалпы 35 миң 550 сом айып пул салынган.
Мындан тышкары, жайлардын ээлерине таштандыларды белгиленбеген жерлерге таштабоо, калдыктарды өрттөбөө жана айлана-чөйрөнү таза кармоо боюнча эскертүүлөр берилди. Аныкталган таштандылар тазаланып, аймактар иретке келтирилди.
