ӨКМ: Көл-Төр көлүндөгү коркунучтун алдын алууга 41 куткаруучу тартылды
Чүй облусунун Кегети капчыгайында жайгашкан Көл-Төр көлүнүн жырылып кетүү коркунучун алдын алуу боюнча ыкчам иштер жүргүзүлдү. Бул тууралуу Өзгөчө кырдаалдар министрлигинин басма сөз кызматы билдирди.
Көлдөгү кырдаалга мониторинг жүргүзүү жана коопсуздукту камсыздоо иштерине ӨКМдин Чүй облусу боюнча башкармалыгынын башчысы, Кыргызгидрометтин директору, Өзгөчө кырдаалдарга мониторинг жүргүзүү жана божомолдоо департаментинин кызматкерлери жана жалпы 41 куткаруучу тартылды.
Көлдөгү суунун көлөмүн азайтуу үчүн куткаруучулар жалпы узундугу 204 метр болгон сифондук түтүктөрдү орнотуп, сууну агызуу иштерин жүргүзүштү.
Буга чейин Өзгөчө кырдаалдар министринин орун басары Алмазбек Асановдун жетекчилигинде жергиликтүү бийлик өкүлдөрү менен биргеликте көлдүн абалына байкоо жүргүзүлүп, тиешелүү алдын алуу жана калыбына келтирүү иштерин жүргүзүү боюнча милдеттер коюлган.
Учурда Көл-Төр көлүндөгү кырдаалга көзөмөл жүргүзүлүүдө.
