Ошто курулуш талаптарын бузган бетон цехинин иши токтотулду
Ош шаарында курулуш талаптарын бузган бетон арыктарын өндүрүүчү цехтин ишмердүүлүгү токтотулду. Бул тууралуу Курулуш, архитектура жана турак жай-коммуналдык чарба министрлигинен билдиришти.
Мамлекеттик архитектура-курулуш контролдоо департаментинин Ош шаардык башкармалыгы жүргүзгөн текшерүүдө И. Раззаков көчөсү, 21 дарегинде жайгашкан цехтин курулушунда мыйзам талаптары бузулганы аныкталган.
Тактап айтканда, курулуш-монтаждоо иштеринде тиешелүү шайкештик сертификаттары жок материалдар колдонулганы белгилүү болгон.
Мыйзам бузуу фактысы боюнча курулуш иштерин жүргүзгөн жеке ишкерге карата акт түзүлүп, административдик чаралар көрүлдү. Ошондой эле мыйзам бузуулар толук жоюлганга чейин объекттин ишмердүүлүгү токтотулду.
Мамлекеттик архитектура-курулуш контролдоо департаменти курулуш иштерин жүргүзгөн юридикалык жана жеке жактарды мыйзамдардын, курулуш ченемдеринин жана техникалык регламенттердин талаптарын так сактоого чакырат.
