Таш-Көмүрдө эски көпүрөнү заманбап эс алуу жайына айландыруу пландалууда
Таш-Көмүр шаарындагы пайдаланылбай калган "Капитальная" көпүрөсүн кайра жандандырып, туристтик объектке айландыруу боюнча эскиздик долбоор иштелип чыкты. Бул тууралуу Курулуш, архитектура жана турак жай-коммуналдык чарба министрлигинен билдиришти.
Долбоор Курулуш министрлигине караштуу Шаар куруу жана архитектура департаментинин Таш-Көмүр шаардык башкармалыгынын архитекторлору тарабынан даярдалган.
"Капитальная" көпүрөсү мурда шаардагы Шахта башкармалыгы тарабынан көмүр өндүрүшүндө пайдаланылган. Көмүр көпүрө аркылуу атайын жол менен темир жолго жеткирилип, андан ары поезддер менен ташылып турган. Советтер Союзу тарагандан кийин көмүр өндүрүү токтоп, көпүрө пайдаланылбай калган.
Эскиздик долбоорго ылайык, жалпы аянты 19 650 чарчы метр же 1,96 гектар болгон аймакты заманбап эс алуу жайына айландыруу сунушталууда.
Бул жерде ресторан, шаарды жана айлана-чөйрөнү бийиктен көрүүгө мүмкүнчүлүк берген панорамалык A-frame үйлөрү, ошондой эле эс алуу аллеясын куруу каралган.
Долбоор пайдаланылбай турган аймакты иретке келтирүүгө жана Таш-Көмүр шаарынын туристтик потенциалын жогорулатууга багытталган.
Учурда эскиздик долбоор кароо жана сунуштарды эске алуу үчүн тиешелүү жергиликтүү мамлекеттик органдарга жөнөтүлдү.
