Аксыда райондук соттун жаңы имараты курулат
Жалал-Абад облусунун Аксы районунда райондук соттун жаңы административдик имараты курулат. Анын пайдубалына мезгил кутусун салуу аземи өткөрүлдү. Бул тууралуу Жогорку соттон билдиришти.
Иш-чарага Жогорку соттун төрагасы Медербек Сатыев, Сот департаментинин директору Бакыт Курманалиев, Жалал-Абад облустук сотунун төрайымы Жыпар Сабырова, Аксы райондук сотунун төрагасы Азат Доулбеков, район акими Азамат Ниязалиев, Кербен шаарынын мэри Жаныш Раимжанов жана мамлекеттик органдардын өкүлдөрү катышты.
Жогорку соттун төрагасы Медербек Сатыевдин айтымында, Аксы райондук сотунун жаңы имараты судьялар менен сот аппаратынын кызматкерлери үчүн тийиштүү эмгек шарттарын түзүп, жарандарды кабыл алуу жана сот процесстерин өткөрүү мүмкүнчүлүктөрүн жакшыртат.
Жаңы административдик имарат соттун толук кандуу иштөөсү үчүн зарыл болгон заманбап шарттар менен камсыздалары белгиленди.
Аксы районунун акими Азамат Ниязалиев жаңы имараттын курулушу жарандар үчүн сот адилеттигинин жеткиликтүүлүгүн жана кызмат көрсөтүүнүн сапатын жакшыртууга өбөлгө түзөрүн айтты.
Иш-чаранын соңунда Медербек Сатыев, Азамат Ниязалиев жана башка катышуучулар жаңы имараттын пайдубалына мезгил кутусун салышты.
Учурда Аксы райондук сотунда 3 судья, сот аппаратынын 10 кызматкери, 6 кенже тейлөөчү персонал жана 6 сот приставы эмгектенет.
