Баткенде сууга агып кеткен адамды 90 киши издеп жатат
Баткен районунда Кожо-Ашкан дарыясына агып кеткен 48 жаштагы эркек кишини издөө иштери уланууда. Бул тууралуу ӨКМдин Баткен облусу боюнча башкармалыгынан билдиришти.
Маалыматка ылайык, бүгүн издөө иштерине Баткен району боюнча ӨКБнын өздүк курамы, Үчүнчү өзүнчө издөө-куткаруу отрядынын 9 куткаруучусу, ИИМдин 38 кызматкери жана жергиликтүү тургундар тартылган. Жалпысынан 90 адам жана 3 дрон издөө иштерин жүргүзүүдө.
Окуя 10-августта болжол менен саат 18:00 чамасында Баткен районунун Төрт-Гүл айыл аймагындагы Чоң-Кара айылына караштуу Кожешкен жерлигинде болгон. Анда 48 жаштагы эркек киши Кожо-Ашкан дарыясына агып кеткени тууралуу маалымат түшкөн.
Издөө иштери 11-августтан бери ӨКМ, ИИМ кызматкерлери жана жергиликтүү тургундардын катышуусунда жүргүзүлүүдө. 12-августта издөөгө кошумча күчтөр жана үч дрон тартылган.
Учурда издөө иштери уланып, кырдаал облус башчысы М. Рахимовдун жеке көзөмөлүндө.
