Бишкекте дизайн-кодго туура келбеген жарнамалар алынды
Бишкектин Ленин районунда өз алдынча орнотулган жарнамалык конструкцияларды демонтаждоо жана башаламан жайгашкан электр, интернет кабелдерин иретке келтирүү иштери жүргүзүлдү. Бул тууралуу мэриядан билдиришти.
Маалыматка ылайык, иштер 11-августта Чүй проспектисинин Павлов, К. Кулиев жана Б. Бейшеналиева көчөлөрү менен кесилишкен тилкелеринде жүргүзүлгөн. Ошондой эле Манас көчөсүнөн Иманалы Айдарбеков көчөсүнө чейинки аралык камтылган.
Аталган аймактарда ишкердик субъекттери тарабынан өз алдынча орнотулган жарнамалык конструкциялар алынып, башаламан жайгашкан кабелдер жана зымдар жыйналып, иретке келтирилди.
Мындан тышкары, ишкерлер өздөрүнө тиешелүү аймактардын айланасын тазалап, санитардык абалын жакшыртуу иштерин жүргүзүштү.
Мэриядан белгилешкендей, бул иштер шаардын эстетикалык көрүнүшүн жакшыртууга, санитардык тазалыкты сактоого жана тышкы жарнамаларды жайгаштырууда дизайн-коддун талаптарын аткарууга багытталган.
Мыйзамсыз орнотулган жарнамаларды демонтаждоо, кабелдерди иретке келтирүү жана шаарды көрктөндүрүү иштери мындан ары да улантылат.
