Бишкектин архитектура тармагында TIM CREDO системасы ишке киргизилүүдө
Бишкек шаар куруу жана архитектура башкы башкармалыгынын адистери топографиялык жана геодезиялык иштерди жүргүзүүдө заманбап TIM CREDO программасын колдонууга өтүп жатат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, ГИС-топография бөлүмүнүн жана шаар куруу кадастрынын адистери программаны өздөштүрүү боюнча окуудан өтүп, аны ишке киргизүү иштерин этап-этабы менен жүргүзүп жатышат.
Жаңы системаны киргизүүнүн негизги максаты — топографиялык жана мейкиндиктик маалыматтарды бирдиктүү стандартка келтирүү, алардын тактыгын жогорулатуу жана маалыматтарды иштеп чыгуу процессин тездетүү.
Ошондой эле алынган маалыматтарды заманбап геомаалыматтык системаларга интеграциялоо мүмкүнчүлүгү түзүлөт.
Министрликтин маалыматына караганда, бул иштер мейкиндиктик маалыматтарды санариптештирүү боюнча заманбап талаптарга ылайык жүргүзүлүүдө.
TIM CREDO программасын колдонуу топографиялык маалыматтарды түзүү жана иштеп чыгууда санариптик ыкмаларга өтүүгө, алардын тактыгын жана бирдиктүүлүгүн камсыз кылууга, ошондой эле шаар куруу тармагында натыйжалуу пайдаланууга шарт түзөт.
