Кара-Балтада абанын булганышы 3,9 эсеге чейин нормадан ашты
Кара-Балта шаарында жүргүзүлгөн мониторингдин жыйынтыгында айрым аймактарда атмосфералык абадагы азот кошкычкылынын концентрациясы белгиленген чектен ашканы аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, Экологиялык мониторинг департаменти Кара-Балта шаарынын тургундарынын кайрылууларынан кийин шаардан жана Ново-Николаевка айылынан абанын үлгүлөрүн алган.
Мониторинг Кара-Балтадагы 40 лет Киргизии, Луговое, Тольятти, Железнодорожная, Токтогул, Самарбек уулу Өмүраалы көчөлөрүндө, ошондой эле Ново-Николаевка айылынын Москва көчөсүндө жүргүзүлгөн.
Изилдөөнүн жыйынтыгында азот кошкычкылынын концентрациясы Кара-Балта шаарынын 40 лет Киргизии көчөсүндө чектүү деңгээлден 3,9 эсеге, ал эми Ново-Николаевка айылынын Москва көчөсүндө 1,9 эсеге жогору болгону аныкталган.
Калган текшерилген чекиттерде көрсөткүчтөр белгиленген чектен ашкан эмес.
Мониторингдин жыйынтыктоочу протоколдору тиешелүү чараларды көрүү үчүн компетенттүү органдарга өткөрүлүп берилди.
