Кызыл-Кыядагы курулуштан улам үйлөргө жарака кеттиби? Текшерүүнүн жообу
Мамлекеттик архитектура-курулуш контролдоо департаментинин Баткен региондук башкармалыгы Кызыл-Кыя шаарынын Кулатов көчөсүндө, Пост ГАИ участкасында курулуп жаткан 7 кабаттуу турак жайга пландан тышкаркы текшерүү жүргүздү. Бул тууралуу Курулуш министрлигинен билдиришти.
Текшерүүгө жергиликтүү тургундардын курулуш иштеринен улам коңшу үйлөрдүн дубалдарында жаракалар пайда болушу мүмкүн деген кайрылуусу негиз болгон.
Текшерүүнүн жүрүшүндө курулуш объектиси жана жакын жайгашкан үйлөр каралып, тургундар көрсөткөн жаракалар курулуш иштери башталганга чейин эле пайда болгону аныкталды.
Объект тиешелүү мыйзамдардын, курулуш ченемдеринин жана Кызыл-Кыя шаарынын башкы планынын талаптарына ылайык иштелип чыккан долбоордун негизинде курулууда. Мамлекеттик экспертизанын оң корутундусу алынган жана объект 2026-жылдын 15-июлунда Мамлекеттик курулуш реестрине катталган.
Учурда "Ренессанс Констракшн" ЖЧКсы жүргүзүп жаткан курулуш иштери Баткен региондук башкармалыгынын адистери тарабынан көзөмөлдөнүүдө.
