Ош туристтик шаар катары мүмкүнчүлүгүн кеңейтет
Ош шаарынын мэри Жанарбек Акаев Министрлер Кабинетине караштуу Туризмди өнүктүрүү боюнча мамлекеттик агенттиктин директору Эдуард Кубатов менен жолугушту. Бул тууралуу мэриядан билдиришти.
Жолугушууда Ош шаарынын туристтик потенциалын жогорулатуу, мейманкана жана тейлөө тармагын өнүктүрүү, туристтер үчүн ыңгайлуу шарттарды түзүү маселелери талкууланды.
Ошондой эле шаарга келген туристтердин санын көбөйтүү жана тарыхый-маданий мурастар менен туристтик жайларды натыйжалуу пайдалануу боюнча пикир алмашуу болду.
Тараптар туризмди Ош шаарынын экономикалык өнүгүүсүнүн маанилүү багыттарынын бирине айландыруу үчүн шаардык инфраструктураны жакшыртуунун маанилүүлүгүн белгилешти.
Жолугушуунун жыйынтыгында тараптар туризм тармагындагы кызматташтыкты мындан ары да улантууну макулдашты.
