Ошто 75 орундуу жаңы бала бакча курула баштады
Бүгүн Ош шаарында 75 орундуу жаңы бала бакчанын пайдубалына мезгил кутусу салынды. Бул тууралуу мэриядан билдиришти.
Жаңы бала бакча Абдыкапар Базаров көчөсүнүн №53/1 дарегинде курулат. Салтанаттуу иш-чарага Ош шаарынын мэринин орун басары Масуда Айдарбекова, шаардык кеңештин төрагасы Болот Баетов, депутаттар жана жергиликтүү тургундар катышты.
Долбоорго ылайык, эки кабаттуу имараттын жалпы аянты 1118,5 чарчы метрди түзүп, 75 балага ылайыкталат. Анда заманбап ашкана, жыйындар залы, медициналык жана уктоочу бөлмөлөр, жылытуу системасы каралган. Сыртында балдар үчүн коопсуз оюн аянтчасы курулат.
Мэриянын маалыматына караганда, аталган аймакта буга чейин чакан жана эски бала бакча иштеп келгендиктен, жаңы мектепке чейинки билим берүү мекемесине муктаждык жогору болгон.
Ошондой эле бул аймакта көп жылдан бери чечилбей келген таза суу маселеси жакында толугу менен жөнгө салынганы белгиленди.
Жаңы бала бакча балдар үчүн коопсуз жана заманбап шарттарды түзүүгө багытталган.
