Бишкекте жылуулук түтүктөрү алмаштырылууда
Бишкек шаарынын мэри Айбек Джунушалиев «Энергетик» насостук станциясында жана Чүй проспектисинде жүрүп жаткан реконструкция иштерин текшерди.
Мэриянын маалыматына ылайык, "Энергетик" станциясында жылуулук менен камсыздоо системасын децентралдаштыруу долбоорунун алкагында отканалар комплекси реконструкцияланууда. Бул жерде жалпы кубаттуулугу 27 МВт болгон үч заманбап газ казаны орнотулууда. Алардын экөөсүнүн кубаттуулугу 10 МВттан, үчүнчүсүнүкү 7 МВтты түзөт.
Мындан тышкары, Чүй проспектисиндеги магистралдык жылуулук тармагы жаңыланууда. Жалпы узундугу 1 080 метр болгон эки тилкеде диаметри 900 мм болгон түтүктөр 1 000 ммлик түтүктөргө алмаштырылууда.
Долбоор шаарды жылуулук менен камсыздоонун ишенимдүүлүгүн жана сапатын жогорулатууга багытталган. Иштер аяктагандан кийин жол катмары жана көчө жарыктандыруусу калыбына келтирилип, аймак көрктөндүрүлөт.
