Чүйдө сел жана суу ташкындарынын алдын алуу иштери күчөтүлөт
Өзгөчө кырдаалдар министри Канатбек Чыныбаев Президенттин Чүй облусундагы ыйгарым укуктуу өкүлү Элкинбек Аширбаев менен биргеликте облустагы бир катар объектилерди текшерди.
Ведомствонун маалыматына ылайык, иш сапардын алкагында Сокулук районунун Исмаил айылындагы сел өтүүчү каналдын абалы менен таанышып, анын натыйжалуу иштешин камсыз кылуу боюнча чараларды көрүү чечими кабыл алынды.
Москва районунда министр ӨКМдин райондук бөлүм башчыларынын жыйынына катышып, өзгөчө кырдаалдардын алдын алуу жана кесепеттерин жоюу иштерин күчөтүү зарылдыгын белгиледи.
Жайыл районунда Степное айылындагы Будковский суу топтоочу курулма жана Феодоровка айылындагы дренаждык тутумдар текшерилди. Суунун нугунан чыгып кетүү коркунучун азайтуу жана аныкталган көйгөйлөрдү чечүү боюнча тиешелүү иштерди жүргүзүү тапшырылды.
Ошондой эле Панфилов районундагы өрткө каршы куткаруу бөлүгүнүн жана Кайыңды шаары менен Панфиловка айылындагы дренаждык тутумдардын абалы каралды.
Иш сапардын жыйынтыгында жооптуу жетекчилерге сел жана суу ташкындарынын алдын алуу, аныкталган көйгөйлөрдү тез арада чечүү боюнча тапшырмалар берилди.
