"Манас Ордо" комплексиндеги реконструкция иштери 85%га бүттү
13-августта курулуш, архитектура жана турак жай-коммуналдык чарба министри Нурдан Орунтаев Талас облусуна болгон иш сапарынын алкагында "Манас Ордо" комплексиндеги реконструкция иштеринин жүрүшү менен таанышты.
Учурда комплекстеги курулуш-монтаждоо иштери 85%га аткарылып, объектте 400дөн ашык куруучу эмгектенүүдө.
Министр реконструкцияны белгиленген мөөнөттө аяктоо үчүн жумушчулардын санын көбөйтүп, курулуш иштерин күчөтүүнү тапшырды.
Долбоордун алкагында административдик борбор, 300 орундуу конгресс-холл, улуттук стилдеги коттедждер, жайкы жана кышкы ашканалар, галерея жана 3500 орундуу маданий-көпчүлүк иш-чаралар борбору курулууда.
225 гектар аянтты ээлеген комплекстеги музейдин аянты 450 чарчы метрден 1500 чарчы метрге чейин кеңейтилди.
"Манас Ордо" комплекси акыркы 30 жылда биринчи жолу масштабдуу реконструкциядан өтүүдө. Курулуш иштерин Кыргызстандын Эгемендүүлүк күнүнө карата аяктоо пландалууда.
