Манас шаарындагы 375 орундуу мектептин курулушу аяктап калды
Курулуш, архитектура жана турак жай-коммуналдык чарба министрлиги Манас шаарында алты мектеп куруп жатат. Алардын бири 375 орунга ылайыкталган №21 жаңы мектеп.
Министрликтин маалыматына ылайык, объект мамлекеттик бюджеттин эсебинен каржыланууда. Курулуш иштери быйыл март айында башталган. Учурда үч кабаттуу мектептин имараты толук тургузулуп, курулуш иштери 85%га аткарылды.
Имараттын ички жасалгалоо иштери дээрлик аяктап, учурда сырткы фасады жасалууда. Мектептин аймагында эки футбол, эки волейбол жана баскетбол аянтчалары курулуп, айланасын көрктөндүрүү иштери жүрүп жатат.
Долбоорго ылайык, жаңы мектеп заманбап талаптарга жооп берип, окуучулардын сапаттуу билим алуусу үчүн бардык зарыл шарттар түзүлөт.
Курулуш иштеринин сапаты министрликке караштуу тиешелүү департаменттер тарабынан көзөмөлдөнүүдө. Мектепти жаңы окуу жылынын башталышына карата толук бүткөрүү пландалууда.
