Өлкө боюнча 985 миң тоннадан ашык дан эгиндери жыйналды
Өлкө боюнча пландалган 617 миң гектар аянттын 57,1%ы — 352,7 миң гектары жыйналып бүттү. Бул өткөн жылдын ушул мезгилине салыштырмалуу 25,9 миң гектарга көп. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Учурда 985,1 миң тонна дан жыйналып, дүң жыйым былтыркыга салыштырмалуу 6,9%га өстү. Орточо түшүмдүүлүк гектарына 27,6 центнерди түзүүдө.
Буудай айдалган аянттардын 80,2%ы жыйналып, жалпы түшүм былтыркыга салыштырмалуу 30,8%га көбөйдү. Арпанын 59%ы жыйналып, орточо түшүмдүүлүгү гектарына 25,1 центнерге жетти.
Чүй облусунда пландалган аянттардын 63%ы, Жалал-Абадда 56,5%ы, Баткенде 62,3%ы жыйналды. Ош облусунда былтыркыга салыштырмалуу 20,1% өсүш катталды. Талас, Ысык-Көл жана Нарын облустарында массалык оруп-жыйноо иштери жүрүп жатат.
Мындан тышкары, былтыркыга салыштырмалуу жашылча өндүрүшү 6,1%га, картошка 7,9%га, бакча өсүмдүктөрү 20,4%га өстү.
