Жыл башынан бери баңгизаттарга каршы 1 300дөн ашуун рейд жүргүзүлдү
Үстүбүздөгү жылдын жети айында Ички иштер министрлигинин Баңгизаттарды мыйзамсыз жүгүртүүгө каршы күрөшүү кызматы 2 100дөн ашуун профилактикалык иш-чара өткөрдү. Бул тууралуу ИИМдин басма сөз кызматынан билдиришти.
Анын ичинде окуучулар, студенттер жана ата-энелер үчүн 600дөн ашуун лекция жана маалыматтык-түшүндүрүү жолугушуусу уюштурулду. Алар баңгизаттарга терс мамилени калыптандырууга жана укуктук сабаттуулукту жогорулатууга багытталган.
Ошондой эле сергек жашоо образын жайылтуу жана баңгизаттарды колдонуунун алдын алуу максатында 60 спорттук иш-чара өткөрүлдү.
Мындан тышкары, жарандар көп чогулган жерлерде, дарыканаларда жана көңүл ачуучу жайларда 1 300дөн ашуун рейд жүргүзүлдү.
ИИМ баңгизаттарды колдонуунун жана мыйзамсыз жүгүртүүнүн алдын алуу боюнча профилактикалык иштер улантыларын билдирди.
