Бишкекте 1-сентябрь күнү кимдер эс алат?
1-сентябрь Бишкек шаарында жайгашкан бюджеттик уюмдардын кызматкерлери үчүн эс алуу күнү болуп белгиленди. Бул тууралуу Эмгек, социалдык камсыздоо жана миграция министрлиги билдирди.
Маалыматка ылайык, бул күнү кызматкерлердин орточо күндүк эмгек акысы сакталат. Тиешелүү чечим Министрлер Кабинетинин 2026-жылдын 10-июлундагы №479 токтому менен кабыл алынган.
Ал эми жеке менчик уюмдары үчүн 1-сентябрды эс алуу күнү катары белгилөө сунуштама мүнөзүндө болот.
Ошондой эле Эмгек кодексине ылайык, 31-август – Кыргыз Республикасынын Эгемендүүлүк күнү иш эмес майрам күнү болуп саналат.
Майрам күнү иштеген кызматкерге тараптардын макулдашуусу боюнча башка эс алуу күнү берилиши, иштеген күнү эмгек өргүүсүнө кошулушу же эмгек акысы кеминде эки эселенген өлчөмдө төлөнүшү мүмкүн.
Министрлик иш эмес майрам күндөрү кызматкерлерди жумушка тартуу Эмгек кодексинде каралган талаптарга ылайык жүргүзүлөрүн эскертти.
