Бишкектеги 14 кабаттуу үйдүн курулушунда мыйзам бузуу аныкталды
Курулуш министрлигине караштуу Мамлекеттик архитектура-курулуш контролдоо департаментинин адистери тарабынан борбор калаадагы курулуш объектилерине туруктуу негизде көзөмөл жүргүзүлүүдө.
Ведомствонун маалыматына ылайык, көзөмөл иш-чараларынын алкагында Бишкек шаарынын Севастопольская көчөсү, 7 дарегинде жайгашкан 14 кабаттуу турак жайдын курулушунда бир катар мыйзам бузуулар аныкталды.
Тактап айтканда, турак жайдын 1-блогунун 7-кабатында плитадан чыгып турган арматуранын коргоочу катмарынын өлчөмү долбоордук талаптарга шайкеш келбегени белгилүү болду.
Аталган кемчилик курулуш конструкциясынын бекемдигине жана ишенимдүүлүгүнө терс таасирин тийгизип, имараттын коопсуздугуна коркунуч жаратышы мүмкүн.
Текшерүүнүн жыйынтыгында аныкталган факт боюнча "Инком системс" ЖЧКсына тиешелүү акт түзүлүп, 200 миң сом өлчөмүндө айып пул салынды.
Мындан тышкары, компанияга аныкталган мыйзам бузууларды белгиленген мөөнөттө жоюу боюнча тиешелүү көрсөтмө берилди.
