Көл-Суу жана Көк-Кыя аймактары таштандылардан тазаланды
Жаратылыш ресурстары, экология жана техникалык көзөмөл министрлигине караштуу Экологиялык жана техникалык көзөмөл кызматынын Нарын регионалдык башкармалыгынын инспекторлору Көл-Суу жана Көк-Кыя аймактарында тазалоо иштерин жүргүзүштү.
Ведомствонун маалыматына ылайык, иш-чарага "Ак-Моюн" муниципалдык ишканасынын кызматкерлери жана туризм тармагында иш алып барган жарандар катышып, аймак таштандылардан тазаланды.
Көл-Суу көлүнүн жээгинде мындай тазалоо иштери мезгил-мезгили менен жүргүзүлүп, аймактын санитардык абалын жакшыртууга жана жаратылышты таза сактоого багытталган.
Белгилей кетсек, буга чейин социалдык тармактарда Көл-Суу көлүндөгү таштандылар тууралуу маалымат тараган. Акыркы үч күндө жааган жамгырдан улам көлдүн деңгээли көтөрүлүп, таштандылар көл аймагына сүрүлүп келген.
