Кыргызстанда 1,5 миң ветеринар туруктуу айлык менен камсыздалат
Кыргызстанда ветеринардык кызмат көрсөтүүнүн сапатын жогорулатуу максатында "Мал аман" мамлекеттик ишканасын түзүү пландалууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Жаңы ишканага алгачкы этапта 1,5 миңге жакын жеке ветеринарды ишке алуу каралган. Алар малдарды эмдөө, кан үлгүлөрүн алуу жана башка мамлекеттик ветеринардык иш-чараларды жүргүзүшөт.
Мамлекеттик тапшырмаларды сапаттуу жана өз убагында аткарган ветеринарларга 30-40 миң сомдун тегерегинде айлык акы төлөө пландалууда.
Мындан тышкары, ишинин жыйынтыгына жараша кошумча бонустар каралат. Ветеринарлар малды дарылоо, операция жасоо жана башка кызматтарды көрсөтүү аркылуу кошумча киреше таба алышат. Жалпы кирешеси 100 миң сомго чейин жетиши мүмкүн.
Учурда "Мал аман" мамлекеттик ишканасын түзүү боюнча токтом долбоору тиешелүү мамлекеттик органдар менен макулдашуу баскычында турат.
Ишкананы жаңы жылдан тарта толук кандуу ишке киргизүү пландалууда.
