Таластагы 5 миң орундуу стадиондун курулушу 75%га аяктады
Курулуш, архитектура жана турак жай-коммуналдык чарба министри Нурдан Орунтаев Талас облусуна болгон иш сапарында Талас шаарындагы борбордук стадиондун курулушу менен таанышты.
Министрликтин маалыматына ылайык, учурда стадиондогу курулуш-монтаждоо иштеринин 75% аткарылып, объектте 300дөн ашык жумушчу эмгектенүүдө.
Министр курулуштун сапатына көңүл буруп, подрядчы уюмга жумушчу күчүн көбөйтүү тапшырмасын берди. Ошондой эле стадион эл аралык стандарттарга толук жооп бериши керектигин белгиледи.
Долбоор боюнча стадион 5 миң көрүүчүгө ылайыкталат. Анда батыш жана чыгыш трибуналары, оюнчулар үчүн шарттар, медиа жана VIP-зоналар, VAR системасы каралган. Мындан тышкары, футболчулар үчүн жатакана, тамактануучу жай жана административдик бөлмөлөр курулат.
Стадиондун курулушу 2025-жылдын 9-апрелинде башталган. Аны Эгемендүүлүк күнүнө карата пайдаланууга берүү пландалууда.
