Таластык фермер 1,5 гектар жерден жылына 13 тоннага жакын малина жыйнайт
Талас облусунун Талас районунда мөмө-жемиш өсүмдүктөрүн өстүрүүгө кызыккан дыйкандардын саны көбөйүүдө. Учурда райондо малина жана ежемалина 12 гектардан ашык аянтка эгилген. Бул тууралуу Айыл чарба министрлигинен билдиришти.
Талас районунда жалпы 35 миң 326 гектар айдоо жери бар. Акыркы жылдары жергиликтүү дыйкандар аймактын климаттык шартына ылайыкташкан малинанын ар түрдүү сортторун өстүрүүгө басым жасап келишет.
Райондун климаттык шарттары малина өстүрүүгө ыңгайлуу болгондуктан, түшүмдүүлүк да жогору. Маселен, Көк-Кашат айылынын тургуну Чыңгыз Азбеков 1,5 гектар жерден жылына 13 тоннага жакын малина алат.
Фермер өстүргөн продукциясын Казакстан жана Россияга экспорттойт. Анын айтымында, малина өстүрүүдө органикалык жер семирткичтерге артыкчылык берилип, химиялык препараттар мүмкүн болушунча аз колдонулат.
Малинанын түшүмдүүлүгү жана ага болгон рыноктук суроо-талаптын жогору болушу жергиликтүү дыйкандардын бул багытка кызыгуусун арттырууда. Натыйжада райондо малина өстүрүлгөн аянт жылдан-жылга кеңейүүдө.
