Ысык-Көл менен Нарындагы үрөндүк аянттарга талаа инспекциясы жүргүзүлдү
Айыл чарба өсүмдүктөрүн жана багбанчылыкты экспертизалоо департаментинин адистери Ысык-Көл жана Нарын облустарында үрөндүк аянттарга талаа инспекцияларын жүргүзүштү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Инспекциянын максаты — үрөн сапатын камсыз кылуу, үрөнчүлүк чарбалардын ишмердүүлүгүн көзөмөлдөө жана белгиленген талаптардын сакталышын текшерүү.
Текшерүү учурунда үрөндүк аянттардын сорттук тазалыгына, өсүмдүктөрдүн өсүп-өнүгүшүнө, фитосанитардык абалына, илдеттердин, зыянкечтердин жана отоо чөптөрдүн таралышына баа берилди.
Ошондой эле үрөн өндүрүүгө коюлган мамлекеттик талаптардын жана үрөнчүлүк эрежелеринин сакталышы текшерилди.
Инспекциянын жыйынтыгы боюнча үрөндүк аянттарга тиешелүү баа берилип, аныкталган кемчиликтерди жоюу боюнча сунуштар берилди.
