"Ала-Тоо Резорт" лыжа комплекси качан ачылары белгилүү болду
Жыргалаң айылында "Ала-Тоо Резорт" төрт мезгилдүү тоо кластеринин лыжа трассаларын жана асма жолдорун куруу боюнча көчмө жумушчу кеңешме өттү.
Ишканадан билдиришкендей, "Ала-Тоо Резорт" ААКнын жетекчилиги жана адистери подряддык жана долбоорлоо уюмдарынын өкүлдөрү менен биргеликте объектилердеги курулуш иштеринин жүрүшүн жеринен текшеришти.
Кеңешменин катышуучулары лыжа трассаларынын айрым тилкелерин жана асма жолдор курулуп жаткан объектилерди көрүп, иштердин темпин жана алдыдагы милдеттерди талкуулашты.
Өзгөчө көңүл лыжа трассаларынын инженердик жана транспорттук объектилер менен кесилишкен тилкелерине бурулду. Адистер курулуш иштерин үзгүлтүксүз улантуу үчүн зарыл болгон техникалык чечимдерди карашты.
Жыйынтыгында биринчи кезекте аткарылуучу иштер, жооптуу тараптар жана аларды бүтүрүү мөөнөттөрү аныкталды.
"Ала-Тоо Резорт" ААК объектилердин курулушун өз убагында аяктоо жана лыжа комплексин 2026-жылдын декабрь айында ачууга даярдоо боюнча иштер уланып жатканын билдирди.
