"Ала-Тоо Резортто" курулуш иштерин тездетүү тапшырылды
"Ала-Тоо Резорт" курортунун аймагында инфраструктура, автомобиль жана технологиялык жолдорду, ошондой эле инженердик тармактарды куруу боюнча көчмө кеңешме өттү.
Анда курулуш аянттарындагы иштердин жүрүшү каралып, жакынкы мезгилге карата милдеттер аныкталды. Өзгөчө көңүл "Кыргызкурулуш" мамлекеттик ишканасы куруп жаткан жети инфраструктуралык объектке жана В-1 станциясынын жанындагы лыжа жабдууларын ижарага берүү борборунун административдик имаратына бурулду.
Кароонун жыйынтыгында подряддык уюмга курулуш иштеринин темпин жогорулатуу, жумушчулардын санын көбөйтүү жана кошумча техника тартуу тапшырылды. Зарыл болгон учурда коопсуздук талаптарын сактоо менен эки сменада, анын ичинде түнкүсүн иштөө каралат.
Мындан тышкары, автомобиль жана технологиялык жолдорду куруу, метеорологиялык станцияларды орнотуу жана курулуш аянттарын керектүү техника, материалдар менен камсыз кылуу маселелери талкууланды.
Энергетика багытында 35 кВ кабелдик линияларды көчүрүү жана реконструкциялоо, төрт канат жолун жана курулуш шаарчасын электр энергиясы менен камсыз кылуу маселеси каралды.
Жыйынтыгында жооптуу уюмдарга конкреттүү тапшырмалар берилип, аткаруу мөөнөттөрү белгиленди. "Ала-Тоо Резорт" ААК курортту өз убагында пайдаланууга берүүгө даярдоо үчүн курулуш иштерин координациялоону улантат.
