Чүйдө милиция кызматкерлери жаранга ооруканага жетүүгө көмөктөштү
Чүй облусунда милиция кызматкерлери жол тыгынынан улам ооруканага жетүүгө үлгүрбөй жаткан жаранга көмөк көрсөтүштү. Бул тууралуу Чүй ОИИББнын Милициянын кайгуул-күзөт кызмат полкунун басма сөз кызматы билдирди.
Маалыматка ылайык, милициянын кенже сержанты А. Доктурбеков жана милиция сержанты Э. Турусбеков кызмат өтөп жүргөн учурда жардам сурап кайрылган жаранга жолуккан.
Жаран жол тыгынынан улам кызын ооруканага өз убагында жеткирүүгө үлгүрбөй жатканын айткан.
Милиция кызматкерлери кырдаалга кайдыгер карабай, анын кызын жакынкы ооруканага тез арада алып барууга жардам беришкен.
Чүй милициясы мындай учурларда кызматкерлердин ыкчам чечими жана адам өмүрүнө болгон жоопкерчиликтүү мамилеси өзгөчө мааниге ээ экени белгиледи.
