Кыргызстанда угуусу начар жарандарга 35 сүйлөө процессору акысыз берилет
Кыргызстанда биринчи жолу республикалык бюджеттин эсебинен Австралиянын Cochlear компаниясынан 35 сүйлөө процессору түз сатып алынды. Жабдуулардын жалпы баасы 30 млн сомду түздү. Бул тууралуу Эмгек, социалдык камсыздоо жана миграция министрлиги маалымдайт.
Бүгүн Республикалык протездик-ортопедиялык мекемеде алгачкы 11 бейтапка сүйлөө процессорлору тапшырылды. Адистер аппараттарды ар бир алуучунун өзгөчөлүгүнө жараша орнотуп, жекече жөндөөлөрдү жүргүзүштү.
Калган алуучуларга аппараттар 19 жана 20-август күндөрү тапшырылат.
Сүйлөө процессору — кохлеардык имплантация системасынын тышкы бөлүгү. Ал айлана-чөйрөдөгү үндөрдү кабыл алып, сигналдарды импланттын ички бөлүгүнө өткөрүп берет. Бул угуусу начар адамдардын үн маалыматтарын кабыл алуусуна, баарлашуусуна жана билим алуусуна жардам берет.
Эмгек, социалдык камсыздоо жана миграция министринин орун басары Аида Исатбек кызынын айтымында, бир сүйлөө процессорунун баасы болжол менен 800 миң сомду түзөт. Мындай аппараттарды өз алдынча сатып алуу үй-бүлөлөр үчүн чоң финансылык чыгым жаратат.
Министрликтен билдиришкендей, Кыргызстанда угуусу начар балдарды жана чоңдорду мамлекеттик бюджеттин эсебинен заманбап сүйлөө процессорлору менен камсыз кылуу биринчи жолу ишке ашырылып жатат.
Жарандарды техникалык реабилитациялоо жана заманбап реабилитациялык каражаттар менен камсыз кылуу боюнча иштер мындан ары да улантылат.
