Ош облусунда 25 мыйзамсыз объект аныкталды
Курулуш министрлигине караштуу Мамлекеттик архитектура-курулуш контролдоо департаментинин Ош региондук башкармалыгы унаа жолдорунун жээктеринде мыйзамсыз жайгашкан соода жана тейлөө объектилерин аныктоо боюнча текшерүү иштерин жүргүзүүдө.
Ведомствонун маалыматына ылайык, текшерүү Кыргыз Республикасынын Президентинин Жарлыгынын негизинде жол боюндагы тейлөө объектилерин мыйзамсыз жайгаштырууга жол бербөө максатында жүргүзүлүүдө.
Текшерүүнүн жүрүшүндө Бишкек – Ош жана Өзгөн – Кара-Кулжа унаа жолдорунун жээктеринде тиешелүү уруксат берүүчү документтери жок иштеп жаткан 25 объект аныкталды.
Алардын 11и жеңил типтеги дүкөн, бешөө чарбалык товарлар дүкөнү, алтоо тез тамактануучу жай жана үчөө чач тарач экени белгилүү болду.
Аныкталган мыйзам бузуулар боюнча тиешелүү тараптарга мыйзам чегинде чаралар көрүлүп, кемчиликтерди жоюу боюнча көрсөтмөлөр жана эскертүүлөр берилди.
Мамлекеттик архитектура-курулуш контролдоо департаменти юридикалык жана жеке жактарды курулуш жана тейлөө объектилерин жайгаштырууда Кыргыз Республикасынын мыйзамдарынын, курулуш ченемдеринин жана техникалык регламенттердин талаптарын так сактоого чакырды.
