Ошто 10 мектеп жана IT-шаарча курулуп жатат
Бүгүн курулуш, архитектура жана турак жай-коммуналдык чарба министри Нурдан Орунтаев Ош шаарындагы бир катар курулуш объектилеринин жүрүшү менен таанышты.
Ведомствонун маалыматына ылайык, иш сапардын алкагында журналисттер үчүн пресс-тур уюштурулуп, шаарда курулуп жаткан социалдык жана ири инфраструктуралык объектилер көрсөтүлдү.
Министрдин айтымында, Президенттин тапшырмасы менен Ошто 10 жаңы мектептин курулушу жүрүп жатат. Алар 275тен 1200гө чейинки окуучуга ылайыкталган.
Ошондой эле эки деңгээлдүү эстакадалык көпүрөнүн, "Эне-Сай Сити" турак жай комплексинин жана "Ош-сити" долбоорунун алкагындагы IT-шаарчанын курулушу тааныштырылды.
Нурдан Орунтаев учурда шаардагы маанилүү объектилерде курулуш иштери активдүү жүрүп жатканын белгиледи. Анын айтымында, негизги талап — курулуштун сапатын камсыз кылуу, каражаттын максаттуу пайдаланылышын көзөмөлдөө жана объектилерди өз убагында бүткөрүү.
Министр ошондой эле курулуш материалдарынын сапаты, каржылоо, объектилердин мыйзамдуулугу жана курулуш иштеринин жүрүшү боюнча журналисттердин суроолоруна жооп берди.
