Жети-Өгүздө 2,5 млн сом үчүн муниципалдык мончо мыйзамсыз күрөөгө коюлган
Жети-Өгүз районунда муниципалдык мүлктү мыйзамсыз күрөөгө берүү фактысы аныкталып, кылмыш иши козголду. Бул тууралуу Башкы прокуратурадан билдиришти.
Райондук прокуратуранын текшерүүсүндө 2022-жылы Ж.К. аттуу жаранга Ысык-Көл облусун өнүктүрүү фондунан 2,5 млн сом пайызсыз кайтарымдуу финансылык жардам берилгени аныкталган. Каражаттын кайтарылышын камсыздоо үчүн Барскоон айыл өкмөтүнүн балансындагы мончо күрөөгө коюлган.
Прокуратуранын маалыматына ылайык, жеке жактын милдеттенмесин камсыздоо үчүн муниципалдык мүлктү күрөөгө берүүгө жол берген бир катар жооптуу кызмат адамдарынын аракеттеринде кызмат абалынан кыянаттык менен пайдалануунун белгилери аныкталды.
Факт боюнча Кылмыш-жаза кодексинин 337-беренеси ("Кызмат абалын кыянаттык менен пайдалануу") менен кылмыш иши козголду.
Учурда тергөө амалдары жүрүп жатат.
